Powered By Blogger

love will last for ever

Tuesday, July 29, 2008

بكون بيت


مركب شراع فى وسط النيل

فى وقت غروب الشمس الليل

تبان خطاويه وحكاوى زمان

وكلام الليل ولا فى الاحلام

بيقوله زمان كان فى انسان

عاشق ليلاه ونجومها كمان

بيقول كلمات من قلبه تعيش

وتعيش وتعيش فى ودان الناس

معقوله زمان كان فى انسان

وحب جنون اخره الحرمان

بيدافع عن كل مشاعره

وان حط حياته على كفه

ويحارب كل قريب وبعيد

علشان لو يوصل لحبيبه

ياما قالوا وعادوا فى حكايه

دفنها الليل يا صبايا

وحكايه احمد و.......ه

هتكون من بكره على مرايا

حلم حياته العمر يطول

ويلف معاها نجوم وبحور

على قد ما يقدر حبه يكون

من بعد مماته طيف مسكون

فى قلب حبيبه فى كل مكان

وان حتى يروح لمكان ملعون

وانا بدعى لربى وانا انسان

وبخاف من ربى عقابه كمان

وبقله يارب انا حبيت

واتمنى تبارك لينا البيت

وان حتى فى عشه انا مليت

لكلام انا لسه بكون بيت

العراف

12 comments:

كوارث said...

قصيدة جميلة جدًا
مكدبش عليك في البداية كنت نويت ابهدلك بس لما كملت عرفت انك مش كاتب اي كلام
واضح انك متمرس في الكتابة
جميل فعلا

العراف said...

ربنا يخليك ده بس من زوقك وربنا ما يجيب بهدله ههههه وانا فعلا سعيد بالزياره الجميله دى ان فى طريقى الي زيارتك واتمنى تكون المدونه بتاعتى عجبتك

Cold air said...

السلام عليكم

ايه الإحساس الجميل ده و تصويرك جميل و تناولك الموضوع كان جيد و يا رب دايما أشوفك مرهف المشاعر و حساس لأن دي بقت عملة نادرة

مع تحياتي

العراف said...

وعليكم السلام اولا انت نورتى المدونه وكمان انا سعيد جدا لزيارتك ورقتك على كلامك الحلو ده ويارب استحقه بجد

PrInCeSS BeRy said...

اخبارك اية الاول يارب تكون بخير

اسمحلى ابدى اعجبابى بالمدونة والسلايد شو بتاع الصور حلو اوى لانى بحب الفلام الهندى جدااااااااااا


اما عن البوست التحفة انت من كلماتك واضح انك رومانسى حساس اسلوبك حلو جدا ما شاء الله

العراف said...

اشكرك برنسس برى كل رقه واحترام انا بالعكس معجب بمدونتك ومؤمن بموهبتك وحاولى بقدر الامكان تنمى هذه الموهبه وحاولى تقرى فى الاوزان علم العروض وحاولى كمان تقرى شعر عاميه كتير وانا سعيد جدا بزيارتك الجميله دى وعلى كلامك الجميل ده

إنتظارات شاهقة said...

كلمات بسيطة ولكنها تحمل فكرة متناسقة
انا مبسوطة بزيارتى مدونتك
ودايما للامام
احترامى

العراف said...

شكرا احلام اليقظه على الزياره الجميله دى ويارب تكونى مبسوطه من المدونه على طول

Desert cat said...

معبرة كلماتك فعلا
لكن اتمنى انك تكون بيت فى وضح النهار والبعد عن كلام الليل لانه دايما بحس انه مالوش فايدة
تحياتى

العراف said...

شكرا لزياتك قطه الصحراء ونصائحك الغاليه دى نورتى يا باشا

نفسي اعيش و اتنفس بلا الم و بلا حزن و بلا دموع said...

مدونة رائعة بجد
وكلمات جديدة على العين و السمع
اسمح لي ان نكون انا غموض من وراد مدونتك هذي
وشرف لنا تواجدنا هنا

سرور

العراف said...

سرور

ده شرف لى انك تكونى من متابعينى وان شاء الله اسعدكم دايما بالجديد